Ռուսաստանի կառավարությունը Պետդումա է ներկայացրել ԱՊՀ երկրների զինծառայողների եւ նրանց ընտանիքների կենսաթոշակային ապահովման եւ զինծառայողների պետապահովագրության մասին՝ 1992-ի մայիսի 15-ին Տաշքենդում ստորագրված համաձայնագիրը չեղյալ հայտարարելու վերաբերյալ օրինագիծ: Համաձայնագրերը վավերացրել են Հայաստանը, Ադրբեջանը, Բելառուսը, Ղազախստանը, Ղրղզստանը, Մոլդովան, Տաջիկստանը, Ուզբեկստանը եւ Ուկրաինան։
Օրինագծով առաջարկվում է չեղարկել նաեւ ԱՊՀ անդամ երկրների սահմանապահ զորքերի զինծառայողների, նրանց ընտանիքների անդամների կենսաթոշակային ապահովման եւ սահմանապահ զորքերի զինծառայողների պետական ապահովագրության կարգի մասին համաձայնագիրը: Համաձայնագրերը նախատեսում են, որ այն դեպքում, երբ կենսաթոշակառուն մշտական բնակություն է հաստատում այլ վայրում, նրան կենսաթոշակ է նշանակվում այն երկրի նորմերի համաձայն, որտեղ նա ապրում է, եւ դադարեցվում է կենսաթոշակը, որը նշանակվել է այն պետությունում, որտեղ ձեռք են բերվել կենսաթոշակային իրավունքներ: