Մոսկվայում նախօրեին ձերբակալել են էկոակտիվիստ, Fridays for future շարժման անդամ Արշակ Մակիչյանի հորն ու եղբորը։ Ըստ Մակիչյանի՝ դա տեղի է ունեցել իրեն, հորն ու եղբորը ՌԴ քաղաքացիությունից զրկելու գործի առնչությամբ վերաքննիչ դատարանում տեղի ունեցած դատական նիստից հետո։
«Դատարանից դուրս գալուց հետո ձերբակալել են հորս, հետո քաղաքում գտել են եղբորս եւ նույնպես ձերբակալել են։ Եվ կրկին անհայտ է, թե ինչ է լինելու հետո։ Ասել են, որ ձերբակալում են, որովհետեւ կեղծ փաստաթղթեր ունի, սակայն դա անհեթեթություն է»,- DW-ի հետ զրույցում ասել է ակտիվիստը։ Հիշեցնենք, որ ակտիվիստը Գերմանիայում է։ Նա համոզված է, որ տեղի ունեցածը նախապես պլանավորված գործողություն է եղել, քանի որ ոստիկանությունը միանգամից չի կարողացել հասկանալ, որ եղբոր փաստաթղթերը անվավեր են ճանաչված։
«Եթե անկեղծ, ես չէի սպասում, որ նրանք կձերբակալեն։ Նույնիսկ ռուսական պետության համար է սա հերթական անկումը, քանի որ ո՛չ հայրս, ո՛չ եղբայրս չեն մասնակցել Ռուսաստանի քաղաքական կյանքին, երբեք իրենց դիրքորոշումը չեն հայտնել։ Նրանք պարզապես ապրել են իրենց կյանքով, եւ հիմա այդ ամենից նրանց զրկում են, քանի որ իմ ազգականներն են։ Նման դեպքեր էլի են եղել։ Դա այդպիսի պրակտիկա է՝ փորձել ճնշել ակտիվիստին ազգականների միջոցով»,- ասել է Արշակ Մակիչյանը։
Արշակ Մակիչյանն անցյալ տարվա հոկտեմբերին զրկվել էր ՌԴ քաղաքացիությունից։ Քաղաքացիությունից զրկվել են նաեւ նրա հայրն ու երկու եղբայրները։ Մակիչյանը նշել է, որ ո՛չ ինքը, ո՛չ եղբայրները այլ քաղաքացիություն չունեն։ Հայրը ժամանակին Հայաստանի քաղաքացիություն է ունեցել, սակայն հրաժարվել է, երբ ստացել է ՌԴ քաղաքացիություն։
Հիշեցնենք, որ իրենց ամուսնության օրը՝ 2022 թվականի փետրվարի 24-ին, Արշակ Մակիչյանն ու նրա հարսնացուն՝ քաղաքական ակտիվիստ Պոլինա Օլեյնիկովան, բացահայտ հանդես են եկել ընդդեմ ռուս-ուկրաինական պատերազմի։ Արշակ Մակիչյանը Գերմանիա՝ Բեռլին է տեղափոխվել անցյալ տարվա մարտին։