ՀՀ առողջապահության նախարարությունից հայտնել են, որ 50-75 տարեկան քաղաքացիների շրջանում կոլոռեկտալ քաղցկեղի վաղ հայտնաբերման սքրինինգային ծրագիրը 2023-ին կշարունակվի եւ կավարտվի 2026-ին:
Առողջապահության նախարարի հրամանով 2022-ի հուլիսից դեկտեմբեր հիվանդության վաղ հայտնաբերման սքրինինգային փորձարարական ծրագիրը ներդրվել է երկու բուժհաստատությունում (Երեւանում եւ Գյումրիում) ՀՀ բնակչության 50-75 տարիքային խմբում` պատահականության սկզբունքով:
Երեւանի «Սուրբ Գրիգոր Լուսավորիչ» բժշկական կենտրոնում անցկացվել է 1727 հետազոտություն։ 93 անձի իմունաքիմիական թեստերը դրական արդյունքներ են ունեցել։ 67 քաղաքացի պետպատվերի շրջանակում ուղեգրվել է կոլոնոսկոպիկ հետազոտության, հայտնաբերվել են տարբեր պաթոլոգիաներ, ըստ անհրաժեշտության կազմակերպվել է նեղ մասնագետի անվճար խորհրդատվություն: Գյումրու «Բեռլին» պոլիկլինիկայում անցկացվել է 368 հետազոտություն։ 4 անձի իմունաքիմիական թեստերը դրական արդյունքներ են ունեցել։ Երկու քաղաքացի պետական պատվերի շրջանակում ուղեգրվել է կոլոնոսկոպիկ հետազոտության, ըստ անհրաժեշտության կազմակերպվել է նեղ մասնագետի անվճար խարհրդատվություն:
Տեղեկանք
Կոլոռեկտալ քաղցկեղը (հաստ աղիքի, ուղիղ աղիքի, սիգմայաձեւ աղիքի) մեծահասակների շրջանում ամենահաճախ հանդիպող չարորակ նորագոյացություններից է, հատկապես շատ են հիվանդության ուշ փուլում հայտնաբերված դեպքերը: Հայաստանում հիվանդացության ամենաբարձր ցուցանիշներն արձանագրվել են 60 եւ բարձր տարիքային խմբում (դեպքերի 83,6%):