Ըստ թուրքական Hürriyet պարբերականի՝ Թուրքիայի ներքին գործերի նախարար Սուլեյման Սոյլուն ահաբեկչական հարձակումների սպառնալիքի մասին ԱՄՆ հայտարարություններից հետո Ստամբուլում եվրոպական մի շարք երկրների հյուպատոսությունների փակումը անվանել է «հոգեբանական պատերազմ» Թուրքիայի դեմ։ Նա հավելել է, որ Միացյալ Նահանգներն ու Արեւմուտքը չեն ցանկանում, որ Թուրքիան անկախ եւ ազատ լինի: «Այն ժամանակ, երբ նպատակ դրեցինք 60 միլիոն զբոսաշրջիկների ներգրավելու, նրանք Թուրքիայի դեմ նոր հոգեբանական պատերազմ ձեռնարկեցին»,- հավելել է թուրք նախարարը:
Թուրքիայի ներքին գործերի նախարարը նշել է, որ ահաբեկչական հարձակումների հավանականության մասին հայտարարած, նման հնարավոր միջադեպերի վայրերը նշած երկրներից եւ ոչ մեկը Թուրքիայի անվտանգության մարմիններից որեւէ մեկի հետ կապ չի հաստատել։
Ահաբեկչական հարձակումների սպառնալիքի մասին նախազգուշացումներից հետո աշխատանքը դադարեցրել են Ստամբուլում Մեծ Բրիտանիայի, Նիդերլանդների, Գերմանիայի եւ Ֆրանսիայի հյուպատոսությունները: Մինչդեռ Ստամբուլում ԱՄՆ գլխավոր հյուպատոսությունից հայտնել են, որ իրենք չեն նախատեսում դադարեցնել աշխատանքն ու այցելուների ընդունումը։