Պետդեպարտամենտի մամուլի ծառայությունից հայտնել են, որ ԱՄՆ պետքարտուղար Էնթոնի Բլինքենը կադրային դիվանագետ Լուիս Բոնոյին նշանակել է Կովկասում բանակցությունների հարցով նոր ավագ խորհրդական։ «ԱՄՆ-ը հանձնառու է Հայաստանին եւ Ադրբեջանին օգնություն ցուցաբերել համապարփակ խաղաղ համաձայնության հասնելու հարցում, որը ներառում է Լեռնային Ղարաբաղի հակամարտության երկարաժամկետ քաղաքական կարգավորումը։ Պարոն Բոնոն երկկողմ հիմունքներով համագործակցելու է համախոհ գործընկերների, ներառյալ ԵՄ-ի, ինչպես նաեւ միջազգային կազմակերպությունների հետ, ինչպիսին է ԵԱՀԿ-ն, Հայաստանի եւ Ադրբեջանի միջեւ ուղիղ երկխոսությանը նպաստելու նպատակով»,- պարզաբանել է Բլինքենը։
ԱՄՆ պետքարտուղարության խոսնակի տեղակալ Վեդանտ Պատելը նշել է, որ Լուիս Բոնոն նաեւ ներկայացնում է Միացյալ Նահանգները ԵԱՀԿ Մինսկի խմբի համանախագահության ձեւաչափում»,- նշել է Պատելը, հավելել՝ այդ հարցը մշտական առաջնահերթություն է Բայդենի վարչակազմի համար»,-ընդգծել է պետքարտուղարության խոսնակի տեղակալը: Վեդանտ Պատելը նշել է նաեւ, որ Բոնոն ունի բարդ խնդիրների հետ աշխատելու զգալի փորձ եւ նոր պաշտոնը ստանձնելու հարցում վայելում է Բլինքենի անձնական վստահությունը:
Նախկինում Բոնոն եղել է ՄԱԳԱՏԷ-ում եւ ՄԱԿ-ի կազմակերպություններում ԱՄՆ ներկայացուցչի պաշտոնակատար Վիեննայում։ Զբաղեցրել է նաեւ ԱՄՆ պետքարտուղարի առաջին տեղակալի խորհրդականի եւ պետքարտուղարի տնտեսական ու գործարար հարցերով տեղակալի պաշտոնը:
Կովկասում բանակցությունների գծով ավագ խորհրդականի պաշտոնը նախկինում զբաղեցնում էր Ֆիլիպ Ռիքերը: Նրա հրաժարականի մասին Պետդեպարտամենտը հայտնել էր հունվարի սկզբին։