Արցախի մարդու իրավունքների պաշտպան Գեղամ Ստեփանյանը հայտնել է, որ Կարմիր խաչի միջազգային կոմիտեին եւ առհասարակ հումանիտար առաքելություն կատարող ցանկացած միջազգային կազմակերպության քաղաքական պահանջներ ներկայացնելը հակասում է միջազգային հումանիտար իրավունքին: «Ադրբեջանը այսօր ցանկացած առիթ օգտագործելու է Կարմիր խաչի առաքելությունը Արցախից հանելու նպատակով: Բայց այժմ միակ միջազգային ներկայությունը, որ ունենք Արցախում, Կարմիր խաչն է, որը քիչ թե շատ իր չեզոքության, անկախության սկզբունքները պահպանելով՝ փորձում է հումանիտար իրավիճակին օգտակար լինել եւ հարցերը կարգավորել»,- նշել է Ստեփանյանը:
Արցախի ՄԻՊ-ը շեշտել է, որ հումանիտար աջակցության համար սահմանված հիմնական սկզբունքներից են չեզոքությունն ու անկախությունը: Պաշտպանի համոզմամբ՝ հումանիտար առաքելություն կատարող կազմակերպությունն ինքը պետք է որոշի՝ ինչպես պետք է աջակցություն տրամադրի տուժած ժողովրդին: «Վստահ եմ, որ Կարմիր խաչի ամենաբարձր օղակներում սա գիտակցում են եւ չեզոքության տարամաբանության մեջ էլ կշարունակեն աշխատել ու չեն տրվի Ադրբեջանի կողմից հարուցվող քաղաքական խոչընդոտներին»,-ընդգծել է Ստեփանյանը:
Արցախի մարդու իրավունքների պաշտպանը նշել է, որ Կարմիր խաչի միջոցով դեղորայքի տեղափոխումը Արցախ եւ բուժառուների փոխադրումն արում է: Մինչդեռ հումանիտար նշանակության այլ բեռների փոխադրումը, որը որպես կանոն անում էին ՌԴ խաղաղապահները, հունիսի 15-ից դադարել է ու մինչ այս պահը չի արվում: Պաշտպանը հույս է հայտնել, որ, եթե որեւէ այլ ձեւով այն հնարավոր չլինի վերականգնել, Կարմիր խաչը պատասխանատվություն կստանձնի նաեւ այս ուղղությամբ: