Ֆրանսիայի ԱԳ նախարար Կատրին Կոլոննան հայտարարել է, որ Ֆրանսիան աջակցում է Ադրբեջանի հետ բանակցությունների միջոցով խաղաղության հասնելուն ուղղված Հայաստանի անկեղծ ջանքերին` պահպանելով Լեռնային Ղարաբաղում բնակվող հայերի իրավունքները: Նա նշել է, որ ասել է այս մասին իր հայ գործընկերոջ` Արարատ Միրզոյանի հետ հեռախոսազրույցի ժամանակ։ «Ֆրանսիան մոբիլիզացնում է իր ուժերը հանուն արդարության եւ միջազգային իրավունքի հանդեպ հարգանքի»,– թվիթերյան իր գրառման մեջ նշել է ֆրանսիացի դիվանագետը։
ՀՀ արտգործնախարար Արարատ Միրզոյանն հուլիսի 6-ին ավելի վաղ հեռախոսազրույց է ունեցել Ֆրանսիայի արտգործնախարար Կատրին Կոլոննայի հետ։ Զրուցակիցները մտքեր են փոխանակել տարածաշրջանում անվտանգության եւ կայունության հարցերի շուրջ: Միրզոյանը ֆրանսիացի գործընկերոջն է ներկայացրել Հայաստան-Ադրբեջան հարաբերությունների կարգավորման գործընթացի վերջին զարգացումները:
Զրուցակիցներն անդրադարձել են առանցքային հարցերին, մասնավորապես Հայաստանի եւ Ադրբեջանի միջեւ պետական սահմանի սահմանազատման, Լեռնային Ղարաբաղի ժողովրդի իրավունքների եւ անվտանգության հարցերի՝ միջազգային մեխանիզմի ներքո հասցեագրման, ինչպես նաեւ տարածաշրջանում տնտեսական ու տրանսպորտային կապուղիների ապաշրջափակմանն առնչվող հարցերի: