Ֆրանսիան պատասխանատվություն է ստանձնում Հայաստանի նկատմամբ անվտանգային հարցերով։ Այս մասին Հանրային հեռուստաընկերության եթերում հայտարարել է Հայաստանում Ֆրանսիայի դեսպան Օլիվիե Դըկոտինյին։
«Այն, ինչ ես տեսնում եմ վերջին տարիներին, երբ Հայաստանը օգնության կարիք է ունեցել, Ռուսաստանը տեղում չի եղել, եւ Արեւմուտքը, որը մեկ բլոկ չէ, այլ իրենից ներկայացնում է բազմաթիվ նախաձեռնություններ, տարբեր կազմակերպություններ, տարբեր երկրներ, այսօր օգնության է հասնում, եւ դա դրական երեւույթ է»,-ասել է դիվանագետը։
Անդրադառնալով Մոսկվայից հնչող այն քննադատություններին, որ Արեւմուտքը եւ Ֆրանսիան անկայունություն են ստեղծում տարածաշրջանում՝ Դըկոտինյին նշել է, որ 2021 եւ 2022 թվականներին Հայաստանի տարածք ադրբեջանական բանկի ներխուժումից հետո դաշնակից Ռուսաստանը օգնության չի ցուցաբերել Երեւանին։
«2023-ին, երբ Ադրբեջանը ռազմական գործողություն սկսեց Լեռնային Ղարաբաղում, Ռուսաստանը, որը հրադադարի երաշխավորն էր 2020-ից սկսած, եւ ուներ խաղաղապահ զորքեր տեղում, չմիջամտեց: Այսպիսով, եթե ինչ-որ մեկը չի օժանդակում Հայաստանի անվտանգությանը վերջին տարիներին, ապա դա Ռուսաստանն է»,-ասել է ֆրանսիացի դիվանագետը։
Նրա խոսքերով այժմ Ֆրանսիան պատրաստակամ է աջակցել Հայաստանին պաշտպանական ոլորտում եւ ստանձնել երկրի անվտանգության հետ կապված հարցերի պատասխանատվությունը։
«Ֆրանսիան պաշտպանության ոլորտում աջակցում է Հայաստանին, որպեսզի երկիրը կարողանա պաշտպանել իր ժողովրդին, ինքնիշխանությունն ու տարածքային ամբողջականությունը։ Ինչ վերաբերում է անվտանգային հարցերին, Ֆրանսիան պատասխանատվություն է ստանձնում Հայաստանի նկատմամբ։ Վերջին ամիսներին պաշտպանության ոլորտում Հայաստանի հետ համագործակցություն ենք սկսել, որը զարգանում է»,-ասել է դիվանագետը։