ՌԴ նախագահի մամուլի քարտուղար Դմիտրի Պեսկովը «Ռոսիա 1» հեռուստաալիքի «Մոսկվա. Կրեմլ. Պուտին» հեռուստահաղորդման լրագրող Պավել Զարուբինին տված հարցազրույցում հայտարարել է, որ ՌԴ նախագահ Վլադիմիր Պուտինը երբեք չի հրաժարվել Վլադիմիր Զելենսկու հետ հանդիպումից, այն տեսականորեն հնարավոր է, բայց պետք է կոնկրետ փաստաթուղթ նախապատրաստվի:
«Բայց որպեսզի հանդիպումը տեղի ունենա, անհրաժեշտ է՝ երկու պատվիրակությունների աշխատանքի ընդերքում հստակ փաստաթուղթ հասունանա։ Ոչ թե գաղափարների հավաքածու, այլ հստակ գրավոր փաստաթուղթ։ Այդ ժամանակ էլ նման հանդիպման հերթը կլինի»,- ընդգծել է Պեսկովը ։
Հարցին, թե կիրագործվի արդյոք այդ փաստաթուղթը, Պեսկովը հիշեցրել է Դոնբասի վերաբերյալ Մինսկյան համաձայնագրերի փորձի մասին: «Մենք ունենք այդ փորձը, հիշում ենք, շատ լավ ենք հիշում եւ գործում ենք համապատասխանաբար»,- ասել է Կրեմլի պաշտոնական ներկայացուցիչը: