ՀՀ ԱԺ պաշտպանության եւ անվտանգության հարցերի մշտական հանձնաժողովում ապրիլի 4-ին քննարկվում է 2020-ի մայիսի 29-ին ստորագրված «ԱՊՀ մասնակից պետությունների զինված ուժերի կապի համատեղ համակարգի մասին» համաձայնագրի վավերացումը ԱԺ հիմնական նիստերի օրակարգ ներառելու հարցը։
Ըստ «Սպուտնիկ Արմենիա»-ի՝ ՀՀ պաշտպանության փոխնախարար Արման Սարգսյանը համաձայնագրի նախագիծը ներկայացնելիս նշել է, որ կապի համատեղ համակարգի մեջ մտնելու են ԱՊՀ անդամ պետությունների զինված ուժերի կապի ուժերն ու միջոցները, որոնց համագործակցությունը կկանոնակարգվի ըստ համաձայնեցված ծրագրի:
Համաձայնագիրը նախատեսում է նաեւ կապի համակարգերի համալրում ժամանակակից միջոցներով։
Փոխնախարարը նաեւ հայտնել է, որ Հայաստանը համաձայնագիրը կվավերացնի վերապահումով: ՀՀ–ն առանձին որոշում կընդունի համաձայնագրի առանձին դրույթների տարածման վերաբերյալ այն պետությունների նկատմամբ, որոնք համաձայնագրին միացել են 2020-ի մայիսի 29-ից հետո։ ԱՊՀ երկրներից համաձայնագիրն այս պահի դրությամբ չեն ստորագրել Ադրբեջանը, Թուրքմենստանը, Ուզբեկստանը, Ուկրաինան ու Մոլդովան։
Նախատեսված է կապի արդիականացում, կապի հանգույցների ակտուալացում
Ըստ փոխնախարարի՝ համաձայնագիրը վերաբերում է պաշտպանված հեռախոսային եւ ՀՀ ՊՆ-ում գործող տեսակապին։ Նախատեսված է կապի արդիականացում, կապի հանգույցների ակտուալացում, սինխրոն աշխատանք ՌԴ ԶՈՒ կապի համակարգերի հետ ու նաեւ ՌԴ-ի ունեցած կապի հնարավորությունների օգտագործում։
Սարգսյանը նաեւ տեղեկացրել է, որ Հայաստանն իրավունք ունի դուրս գալու համատեղ կապի համակարգից` 6 ամիս առաջ նախապես տեղյակ պահելով գործընկերներին։ Բայց այդ դեպքում նախատեսված են որոշակի ֆինանսական տույժեր։
«Հայաստան» խմբակցության պատգամավոր Տիգրան Աբրահամյանը տարակուսանք է հայտնել՝ ինչ է ՀՀ-ին տալու սույն համաձայնագրի վավերացումը, որ չի տվել ՀԱՊԿ եւ ՀՀ-ՌԴ միջպետական համաձայնագրերով։