2007-ի հունվարի 19-ին «Ակօսի» խմբագրության դիմաց 17-ամյա թուրք ազգայնական Օգյուն Սամասթի կրակոցներից սպանված պոլսահայ լրագրող, մտավորական, «Ակօս» շաբաթաթերթի հիմնադիր խմբագրապետ Հրանտ Դինքի սպանության գործով Ստամբուլի շրջանային դատարան ներկայացված բողոքի քննությունն ավարտվել է։
Դատարանը հաստատել է 61 մեղադրյալի, նրանց թվում՝ Դինքի սպանության գործում հանցավոր անփութություն դրսեւորած նախկին ոստիկանապետներ Ալի Ֆուաթ Յըլմազերի եւ Ռամազան Աքյուրեքի ազատազրկման եւ արդարացման դատավճիռները։
Այսպիսով, դատարանի որոշմամբ, հաստատվել է Ստամբուլի 14-րդ քրեական պալատի որոշումն առ այն, որ Թուրքիայում ահաբեկչական համարվող գյուլենականներն աջակցել են սպանության հեղինակներին եւ հրահրողներին:
Անցած տարվա մարտին 76 մեղադրյալների վերաբերյալ վճիռներ էին ընդունվել: Նրանցից 6-ը կալանավորվել են, իսկ 13-ը փախուստի մեջ են:
Նրանցից նախկին ոստիկանապետներ Ալի Ֆուաթ Յըլմազերը եւ Ռամազան Աքյուրեքը դատապարտվել են ցմահ բանտարկության՝ «դիտավորությամբ սպանության» մեղադրանքով: Ընդհանուր առմամբ 26 մեղադրյալներ դատապարտվել են տարբեր չափերով ազատազրկման։ Մինչդեռ 37 ամբաստանյալներ արդարացվել են, 13 ամբաստանյալների գործերն առանձնացվել են փախուստի մեջ գտնվելու պատճառով։
Հրանտ Դինքի սպանությանն աջակցելու համար նույն թվականին կալանավորված, 2013-ին 12 տարի եւ 6 ամիս ազատազրկման դատապարտված եւ փախուստի մեջ գտնվող Ահմեդ Իսքենդերը արտահանձնվել է Թուրքիա:
Թեեւ սպանության գործով մի շարք դատապարտվածներ կան, սակայն Դինքի ընտանիքում համոզված են, որ իրական մեղավորները բացահայտված չեն: