Դոմենային անվանումների գրանցմամբ զբաղվող «Հայաստանի ինտերնետ հանրություն» կազմակերպության փոխնախագահ Գրիգոր Սաղիյանը հայտարարել է, որ չինական տելեկոմ-սարքավորումների արգելման ԱՄՆ նախաձեռնությունը կարող է ազդել Հայաստանի վրա, եթե հանրապետությունը սկսի 5G կապի անցնել:
ԱՄՆ նախագահ Ջո Բայդենը 2021-ին ստորագրել է «Վստահելի սարքավորումների մասին» օրենքը (Secure Equipment Act)։ Ըստ այդ օրենքի՝ հեռահաղորդակցության ազգային կարգավորիչը (FCC) պետք է կազմի տելեկոմ-սարքավորումների մատակարարների «սեւ ցուցակ»: Դրանք չեն կարող օգտագործվել ԱՄՆ-ում` ազգային անվտանգության նկատառումներով։
Ամերիկյան պարբերականները դեռ հոկտեմբերին հայտնել էին նախագծի մասին, որով ԱՄՆ պետական հիմնարկներն արդեն իսկ առաջնորդվում են, եւ որով արգելքի տակ կարող են հայտնվել չինական ZTE եւ Huawei ընկերությունների ցանցային սարքավորումները։
Վերջերս Հայաստանի ինտերնետ-հանրությունը հարցում է ստացել ԱՄՆ դեսպանատնից։ Կազմակերպությանը խնդրել են տեղեկացնել՝ արդյոք այն օգտագործո՞ւմ է Huawei կամ ZTE սարքավորումներ, թե՞ ոչ: Սաղիյանը չի բացառել, որ արդյունքում փաստացի երկու ինտերնետ կհայտնվի. մեկը՝ «չինական», մյուսը՝ «ժողովրդավարական»։ Սակայն խոսքը 5G ցանցերի մասին է, այսինքն՝ հաջորդ սերնդի: Իսկ Հայաստանում այդ կապը դեռ չի գործում, եւ իշխանությունները դրա ներդրման ժամկետների մասին չեն խոսում։