Միջերկրական ծովից ՀՀ տարածք ակտիվ ցիկլոնի ներթափանցմամբ պայմանավորված՝ փետրվարի 2-ին կեսօրից հետո եւ երեկոյան կողմ, ինչպես նաեւ փետրվարի 2-ի լույս 3-ի գիշերը հանրապետության մեծ մասում սպասվում է ձյուն։
«Լոռիում, Արագածոտնի լեռնային գոտիներում, Կոտայքում, Գեղարքունիքում, Վայոց ձորի լեռնային գոտում ինտենսիվ, առանձին հատվածներում սպասվում է քամու ուժգնացում 18-20մ/վ արագությամբ, բուք, ցածր հորիզոնական տեսանելիություն»,– նշված է «Հիդրոօդերեւութաբանության եւ մոնիտորինգի կենտրոնի» հաղորդագրությունում։
Արարատյան դաշտում եւ Երեւանում կեսօրից հետո սպասվում է թաց ձյուն եւ ձնախառն անձրեւ, երեկոյան ժամերին եւ առաջիկա գիշերը՝ ձյուն։ Փետրվարի 2-ի լույս 3-ի գիշերը եւ առավոտյան հանրապետության ավտոճանապարհներին սպասվում է մերկասառույց, եւ վարորդներին հորդորում են ցուցաբերել զգոնություն։
Տեղումները կդադարեն փետրվարի 3-ի ցերեկը։