Սլովակիայի էկոնոմիկայի նախարար Ռիխարդ Սուլիկը հայտարարել է, որ Սլովակիա ռուսական գազի մատակարարումները դադարեցնել չի կարելի, եւ եթե Ռուսաստանը պայման է դնում վճարում կատարել ռուբլով, նշանակում է՝ պետք է վճարել ռուբլով։
Ըստ Սուլիկի` Սլովակիան ՌԴ-ից ձեռք է բերում իրեն անհրաժեշտ գազի շուրջ 85%-ը։ Նա նշել է, որ կողմ է գազի մատակարարման դիվերսիֆիկացիային, բայց համարում է, որ դրա համար մի քանի տարի է հարկավոր։
Գազին առնչվող ներկայիս իրավիճակը լուծելու համար, ըստ Սուլիկի, մոտ 6 շաբաթ է մնացել։
«Կողմ եմ, որ այդ հարցում գործենք համատեղ ԵՄ-ի շրջանակում եւ ընդհանուր լուծում գտնենք։ Բայց մեզ գազից կտրել չի կարելի»,- ընդգծել է Սլովակիայի էկոնոմիկայի նախարարը։
Լատվիական Latvijas Gāze ընկերությունում եւս հավանական են համարել ռուսական գազի դիմաց ռուբլով վճարմանն անցնելու հնարավորությունը։ Ռուսական ազգային արժույթով վճարումն, ըստ ընկերության ներկայացուցիչների, չի խախտում պատժամիջոցների ռեժիմը:
Ռուսական գազից ամբողջությամբ առայժմ հրաժարվել է Լիտվան՝ հայտարարելով, որ Կլայպեդայի հեղուկ բնական գազի տերմինալը լիովին բավարարում է երկրի վառելիքի պահանջարկը։
Եվրոպական երկրները դեռ չեն կարողացել միասնական դիրքորոշման գալ թե՛ ռուբլով վճարման, թե՛ Ռուսաստանից էներգակիրների մատակարարումից հրաժարվելու հարցում։