ՌԴ-ում ՀՀ դեսպանությունն իր խորին հիասթափությունն է հայտնում Համառուսաստանյան ցուցահանդեսային կենտրոնում (նախկին ВДНХ) Շուշիի իբրեւ թե «ազատագրման» մասին պատմող ադրբեջանական ֆիլմի ցուցադրության կապակցությամբ։
ՀՑԿ-ի «Ադրբեջան» տաղավարում նոյեմբերի 9-ին ցուցադրվել է ադրբեջանցի կինոպրոդյուսեր Արզու Ալիեւայի «Շուշա, դու ազատ ես» ոչ խաղարկային ֆիլմը: Այն պատմում է 2020-ի աշնանը Արցախի խաղաղ բնակչության դեմ ադրբեջանական ռազմական ագրեսիայի մասին։
«Գործողությունը դիտարկում ենք որպես բացահայտ սադրանք, որն ուղղված է ազգամիջյան տարաձայնությունների հրահրմանը եւ վերջին տարիներին ձեռնարկված բազմաթիվ ջանքերի խափանմանը՝ ՌԴ տարածքում ինչպես Հայաստանի եւ Ադրբեջանի, այնպես էլ երկու երկրների համայնքների միջեւ լարվածության հետագա սրում թույլ չտալու նպատակով»,- նշված է հայտարարության մեջ։
Դեսպանությունն այս ֆիլմը բնորոշում է որպես ադրբեջանական հայատյաց քարոզչության հերթական արտադրանք, որը ոչ միայն վիրավորում է ՌԴ տարածքում բնակվող մեծաթիվ հայ համայնքին, Հայաստանի եւ Արցախի հայերին, այլեւ ատելության եւ այլատյացության ակնհայտ ուղեցույց է ադրբեջանական երիտասարդության համար։
«Ակնհայտ է, որ նման գործողություններով ադրբեջանական կողմը միջազգային հանրության աչքում փորձում է արդարացնել ինչպես 2020-ի պատերազմի, ապա 2021-2022 թվականների հետագա իրադարձությունների ժամանակ ԼՂ բնակիչների եւ նրանց պաշտպանների դեմ իրականացված ծանրագույն պատերազմական հանցագործությունները, այնպես էլ Լեռնային Ղարաբաղի գրավյալ տարածքներում վանդալիզմի դեպքերը»,- շեշտել են դեսպանությունից։