Ըստ իրանական Pars Today գործակալության՝ Թեհրանում Ադրբեջանի դեսպան Ալի Ալիզադեն նախօրեին կանչվել է Իրանի արտաքին գործերի նախարարություն։
Գործակալությունը նշել է, որ Իրանի Իսլամական Հանրապետության դեմ Ադրբեջանի լրատվամիջոցների եւ պաշտոնական անձանց հակաիրանական քարոզչությունը շարունակվում է։
Ադրբեջանի դեսպանին հաղորդվել է Ադրբեջանի բարձրաստիճան պաշտոնյաների անբարյացակամ հայտարարությունների եւ այդ երկրի ԶԼՄ-ների ապատեղեկատվության նկատմամբ Իրանի դժգոհության մասին։
Ալի Ալիզադեն ափսոսանք է հայտնել եւ հայտարարել, որ Իրանի բողոքը անմիջապես կփոխանցի Բաքվին։
Ավելի վաղ Իրանի ԱԳՆ խոսնակ Նասեր Քանանի Չաֆին հայտնել էր, որ Թեհրանը մշտապես ընդգծել է տարածքային ամբողջականության պահպանումը եւ Ադրբեջանի ու Հայաստանի միջեւ վեճերի խաղաղ կարգավորումը միջազգային իրավունքին համապատասխան եւ դատապարտել է Ադրբեջանի տարածքների բռնազավթումը եւ ամենաբարձր մակարդակով աջակցել դրա ազատագրմանը: