Հայաստանի Անվտանգության խորհրդի քարտուղար Արմեն Գրիգորյանը Իրանի Իսլամական Հանրապետության դեսպան Մեհդի Սոբհանիի հետ հանդիպմանը հայտարարել է, որ Հայաստան-Իրան սահմանը խաղաղության ու բարեկամության սահմանն է, եւ որեւէ ուժ չի կարող խզել երկրների մեջ առկա տարածքային կապը: Այս մասին տեղեկացնում է Հայաստանում Իրանի դեսպանատունը։
Հաղորդագրության տեքստում նշվում է, որ Հայաստանում դեսպան Սոբհանին ՀՀ ԱԽ քարտուղարի հետ հանդիպմանը ընդգծել է Իրանի դիրքորոշումը` կապված միջազգային սահմանների անփոփոխելիության, ցանկացած աշխարհաքաղաքական փոփոխությանը դեմ լինելու եւ հարեւանների տարածքային ամբողջականությանը աջակցելու վերաբերյալ։
Իր հերթին Գրիգորյանն էլ շնորհակալություն է հայտնել Հայաստանի տարածքային ամբողջականությանը աջակցելու եւ միջազգային սահմանների անփոփոխելիության շուրջ Իրանի դիրքորոշման համար ու ընդգծլ, որ «հայ-իրանական սահմանը խաղաղության, բարեկամության ու խաղաղ համակեցության սահմանն է: Հայաստանը հատուկ կարեւորություն է տալիս Իրանի իսլամական հանրապետության հետ հարաբերություններին, եւ որեւէ ուժ չի կարող խզել Իրանի եւ Հայաստանի տարածքային կապը»։
Ընդգծելով, որ Հայաստանի տարածքում ցանկացած ապաշրջափակում կլինի երկրի ներքին ինստիտուտների վերահսկողության եւ երկրի ազգային եւ տարածքային սուվերենության ներքո՝ Գրիգորյանն նշել է, որ Երեւանը դեմ է միջանցքի տրամաբանությամբ ցանկացած ապաշրջափակման։